Für unsern Schützenmeister zum Dank !    

Mei liaba Hans, jetz is vorbei
mit der "Chef - Anrederei" !
De Mehran kennans no net fassn,
dass du die nimmer wähln hast lassn,
dei Vize hat bis z` lezt no g`hofft,
mim guadn Zuaredn macht`as doch,
deswegn hama a no gwart
und koa Dankesfeier gstart.
Aber heit
is schließlich doch so weit,
a Laudatio soll i bringa,
a Lobliad auf dei Arbat singa,
i hoff, dass mei Tonart stimmt
und guad in deine Ohrn klingt.

Früher war`ma kloa beinand,
mit de Leit und mit`m Stand,
auf oamoi san do Schützn kemma,
de was Groß` in Angriff nehma.
A so a Treiba war da Hans,
er mecht an neia Schütznstand
und de Sache mit`m Bräu,
wia da Vatrag für d` Zukunft sei,
des ziagt se vui z`vui in de Läng,
und hätt boid Differenzn gebn.
Mim Lenz, der damois Vorstand war,
red ma se aus und boid is klar:
"an Dachbodn nauf baun mia für d`Schützn,
an Schiassstand, der soi grad so blitzn".
Und scho konn ma von Hans und Werner
de Effizienz der Arbeit lerna,
boid drauf werd dann nomoi baut
und wer heit an Dachbodn schaut,
schlackat grad no mit de Ohrn,
was is aus dem Krempe worn !

Irgendwann, so zwischndrin
san de neia Wahln gwen,
mia ham dir s`Vertrauen gschenkt
und i persönlich hab mia denkt,
solang i s´Gwahr dahoitn ko,
bleibst du Schütznmoasta - Mo.


Du host dei Amt vui z boid aufgebm,
denn i konn d Bix no leicht dahebm.

Doch wenn i des so recht betracht,
hast du in 6 Jahr so vui gschafft,
wo andre Schützn guad und gern,
in zwanzg Jahr net fertig wern:

Ausbaut, Gwehr kafft, Internet,
Schütznblattl nei erstellt,
Rundnwettkampfgruppn gmacht,
d`Pfeilstifter zu uns herbracht,
Jugnd zum Schiaßn animiert,
Zuschüss Spendn eikassiert,
nebn Gmeinde - Dorf - und Freindschaftsschiaßn
Schütznkönig macha müaßn,
...a... macha derfa, woit i sagn,
an Meistpreis möglichst immer habn,
Gauschiaßn und Schütznbälle,
und dann no auf alle Fälle
d`Gsellschaft, s´ Feiern net vagessn,
de Krönung dabei is doch gwesn,
daß bei unserm 50 Jahr Fest,
Standartnweihe gwesn ist,
sonst no an haufa, des und sell,
doch hör i auf an dera Stell,
denn wenn i aufzähl detailliert,
was in de 6 Jahr is passiert,
dann brauch i ganz gwiß no a Stund
und red gfransat mir mein Mund,
mia oisam wissns sowieso,
was du ois Schütznmoasta to.
Soist`as selba moi vagessn
konnst`as am Krügl nochelesn,
des i übareichn derf ois Dank
für dei Schützenmeisteramt.