A Schütz, der aktiv schiaßn konn,

geht reglmäßig pro Saison

mindestens oamoi de Woch zum

Wirt und dann an´Schießstand hoch.

Des machan Kinder ab 10 Jahr,

´s Mittelalter und sogar, Manner-

leit und Damenwelt de ma zu de

jungbliebma Altn zählt.

Doch Gott sei Dank is´ bei uns ned so-

und über des san mia recht froh

Dass d´Gsellschaft hat an großen Wert,

wo gratscht und glacht und drunga werd,

und wenn´s oam dann persönlich daugt,

ma zum Schiaßn aufeschaugt.

Falls aber waar, dass auf oan Schlag

de ganze Bande naufgeh mag,

sitzat neamd mehr dort am Tisch,

vawaist waar d´Wirtsstubn auf oan Wisch

Doch gibt´s bei uns- dem Herrn sei Dank-

de Passiv-Schützn ja scho lang, de

se an´Stammtisch zuawereibn,

mitunter recht lang sitzn bleibn.

Hie und da konns zwar passiern,

dass koan laarn Platz mehr kriegn.

Zwecks dem an neia Tisch ofanga?

A woher- a Schtui is oiwei no zuaweganga,

und no oana und nomoi rucka,

bis ses hint schier ausedrucka.

Aber sche´is, wenn´s beianda sitzn,

a weng dischkrian, aBrotzeit essn,

Anteil nehman an de Sachan, de

de Schützen hoit so machan,

dabei san, wenn was gfeiert werd,

weil se schließlich des so ghert.

Des soll a weiterhin so bleibn,

wünscht se da Chef vo dem Verein,

denn d´Gsellschaft is fast so vui wert,

Als wenn a Zehner-Serie gschossn werd.